FB_IMG_1482649703512

Macam – Macam Meugah Lam Donya

MACAM-MACAM
CATATAN MOHYANSEN
~~~~~~~~~~~~~~~

MACAM DUM MEUGAH
Oleh Mohyansen Yansen

Meugah gurugok na timphan balon.
Meugah lhok sukon tgku mustafa.
Meugah blang lancang na Pt aron.
Meugah nek aton linto golomna.

Meugah peudada na uleue sudong.
Meugah lam gampong kareuna kaya.
Meugah ampon din bak asah rincong.
Meugah dek payong tari that rupa.

Meugah tapeusi kareuna dalong.
Meugah di burong han deuh bak mata.
Meugah keu jurang kareuna palong.
Teuma meugah krong wab hantrok tawa.

Meugah pak ulis bak racik abon.
Meugah meupanton nyena yang baca.
Meugah seudati watei ji ayon.
Meugah lom nek don jikheun syaikuna.

Meugah di laot bakat meugulong.
Meugah lam jurong na bak kupula.
Meugah lam lampoh geutanom jagong.
Teuma meugah lon meubulei dada.

Meugah peujabat watei jikurong.
Meugah keu untong ban gasien papa.
Meugah jisamon jikheun jisandrong.
Meugah keu tong-tong, ban kura-kura.

Meugah di rumoh geunteng keububong.
Meugah di anjong na guci tuha.
Meugah di para beundera geu lhong.
Meugah keu bakong ban troeh ulua.

Meugah bak pageu timoh keurundong.
Meugah oen murong keu ubat mata.
Meugah oen ranup meuputa ujong.
Meugah lhok nibong na ceundra mata.

Meugah jroh rupa kareuna idong.
Meugah bit mancong awak eropa.
Meugah nyang pesek u dalam jikong.
Soe yg khuen keu long jeut kheum beuraya.

Meugah jeut keu syeh bak peuron-peuron.
Meugah di ampon yoeh masa raja.
Meugah algojo peudeung ji ayon.
Meugah di ulon meu sapue hana.

Meugah di himbei mirah bak punggong.
Meugah di lutong itam that muka.
Meugah di gajah panyang boh idong.
Meugah boh kitong bak aneuk dara.

Meugah jitumei banlheuh jikurong.
Meugah jikeupong watei leo massa.
Meugah that meuhai yum sikrek tudong.
Nyopat ija krong lonbi keu gata.

Meugah peunyanyi kuwasa panggong.
Meugah ma ruhoi bak sandiwara.
Meugah ronaldo bak sipak langsong.
Miesie ji sanjong carong ba bola.

Meugah yoe ulat keu cicem murong.
Meugah keuceubong malam jibungka.
Meugah di jawa bak pakek angklong.
Meugah na untong watei takira.

Meugah that mangat lincah boh jantong.
Jitamah reubong si bungong kala.
Na gula mirah jileng lam gayong.
Tubiet ie idong teukap capli jra.
~~~~~~~~~~~~~~~~~~~~

MACAM-MACAM PANCURI
Oleh Mohyansen Yansen

Pancuri manok kaceukok idong.
Pancuri jagong meubulee dada.
Pancuri silop jigrob dalam tong.
Pancuri teupong jipoh ngon nuga.

Pancuri geutah kareubah lam kom.
Pancuri sarong ka keunong deura.
Pancuri tubee jithee di geudong.
Pancuri lutong jiloep peunjara.

Pancuri pisang meusang that ang-ong.
Pancuri gampong minah u kuta.
Pancuri itek centek that untong.
Pancuri beutong meusandiwara.

Pancuri jinoe jideungoe dukon.
Pancuri sagon ka meu ek mata.
Pancuri pade meukude kitong.
Pancuri sandrong kawabah buta.

Pancuri saket jilet le burong.
Pancuri patron ji’ek avanza.
Pancuri beusoe jigilhoe langsong.
Pancuri tumbon peunajoeh raya.

Pancuri bileh jipileh kalong.
Pancuri bon-bon awak asrama.
Pancuri dilee meutempee punggong.
Pancuri tiyong carong meuhaba.

Pancuri honda tanda jiba krong.
Pancuri utom kajeut keu raja.
Pancuri uleue creue bak kurundong.
Pancuri tutong meuraba bara.

Pancuri puyoeh sa’oeh da aton.
Pancuri rabon meukaca mata.
Pancuri muloeh pajoeh kurungkom.
Pancuri seu’oen ulee that raya.

Pancuri aneuk jimeuk keu ayon.
Pancuri tabong hana meuhoeba.
Pancuri kipah jikisah bak lon.
Pancuri jantong cue pisang raja.

Pancuri timah keumah lam jurong.
Pancuri tudong dalam uroe kha.
Sifheut pancuri peci that sirong.
Dasya jitanggong si umu doenya.

Pancuri pulsa jiba talipon.
Jipeugah bak lon lewat beuranda.
Hadiah merzi jibi ngon forton.
Jiyue cok langsong troh u jakarta.

Yoeh phon jipeugah lewat talipon.
Pajak lon tanggong watee troh jiba.
Bek peugah bak gop bek rhop ngon kawom.
Takot jihudom watee lon gisa.

Lewat es em es bek peuyeh hukom.
Tapasoe keulon pulsa sijuta.
Di ureung rumoh kamehmoh langsong.
Kajiyue peuron pade sigunca.

Teu ingat motoe uboe bit forton.
Rab jadeh dilon rugoe meujuta.
Alahna abi sudi geutulong.
Nyan buet peurabon bek tapeucaya.

Laju geupeugah kisah awai thon.
Hadiyah sabon ka jipeutaba.
Trok u jakarta ka hana gudong.
Ureung talipon pih tandeuh rupa.
~~~~~~~~~~~~~~~~~~

MACAM- MACAM TEURHOK
Oleh Mohyansen yansen

Teurhok boh seutui ule geu sundi.
Teurhok boh capli jipoe meuk mata.
Teurhok ngon boh jreng meunyum phet bibi.
Teurhok boh siri jikheun geureuda.

Teurhok pajoh bu seulaweut nabi.
Teurhok bak jeup ie tabaca doa.
Teurhok bak plueng-plueng teuntei jen geuti.
Teurhok peunyanyi Gadoeh suara.

Teurhok boh timon tacupet gaki.
Teurhok boh punti geuyue cupet pha.
Teurhok ngon teuleung jeb ie ngon bati.
Teurhok abuli kukhem bee raya.

Teurhok di jame wap hana kupi.
Teurhok pancuri hana meupue ba.
Teurhok pak doktoe suntik disentri.
Teurhok peulisi jitilang honda.

Teurhok lon tuan han meupue rawi.
Teurhok adekti teu`oh le kanda.
Teurhok nek cantek hanle soe sudi.
Teurhok nek sani ka wafuanna.

Teurhok rab tembok kakeumong bibi.
Teurhok dek hany hantom komenta.
Teurok lon teungku katrok u sigli.
Teungoh jep kupi ngon abang baka.

Teurhok boh itek meunyum bee hanyi.
Teurhok boh punyie muntah keulua.
Teurhok di dukon burong meunari.
Teurhok kiyayi amplop golomna.
~~~~~~~~~~~~~~~~~~

MACAM DUM MANGAT
Mohyansen Yansen.

Mameh ie jok leukiet madu.
Leumak ie u ladom reuhang.
Bak lon mangat ‘oh ban lheuh bu.
Piep ceurutu rukok galan.

Tatumuleh kon bak buku.
Lonci ramu saboh peusan.
Lon tik hape deuh bak layeue.
Nak meuceuhu adat reusam.

Mangat nyang phon kawom teungku.
Teudong dikeue dak lam kawan.
Bak khanduri syit jijamu.
Macam ta eu dalam hidang.

Mangat lheuh nyan ureung mu-ue.
Adak brat creue na soe gulam.
Tinggai geuduek ateuh keubeue.
Meuban geutreue jijak rijang.

Mangat keulhee ureung ku- u.
Hana soe yue sabab gobnyan.
Jeut geulawok macam bumbu.
Peugot putu atoe timphan.

Mangat leumak kuwah labu.
Ba u dapu tamah santan.
Beupah saka teupong sagu.
Ngon dek meulu tameutran-tran.

Leubeh mangat jeut keuguru.
Duek bak bangku baca koran.
Meunyoe murid peugot karu.
Rhom ngon gapu cara tatham.

Cukop mangat bak peururu.
Kheun rangkapue keupiyasan.
Soe nyang beugeh teuseurah yu.
Di lon abu syit han mumang.

Mangat cewek beutarayu.
Kirem lagu peugah sayang.
Hate tanyoe pat jiteupue.
Dak meusiseue na dek wulan.

Mangat meu-en malam minggu.
Seupot sabtu peugah beutrang.
Banka jijak keudeh tahue.
Tapeulague rata kubang.